L’osiau d’ France

A Adolphe Lefrancq.

Y-ara bientôt trois ans qué l’All’mand nous tracasse,
Qué l’ canon, jour et nuit, n’a point cessé d’ buquer,
Trois ans qu’ nos soldats lutt’nt pou qu’in nous débarasse,
Trois ans qu’in a point vu un seul ed’ nos troupiers.

L’uniqu’ bonheur qu’in a, ch’est d’ vettier dins l’espace
L’aéroplan’ français qui d’zeur nous vient voler.
Aussi longtemps qu’in peut, dins les airs in suit s’ trace,
In goûtant l’ court momint qu’in a pou l’admirer.

Quand, su c’ bel osiau d’ Franc’ l’ canon boch’ lanc’ des bombes
Del mitrall’, des obus et des shrapnell’s in trombes,
L’ coeur frémit d’émotion, mais les yeux r’vett’nt incor.

L’avion file dins l’ ciel bleu parmi les blancs nuaches.
Qui font autour ed’ li des floconneux panaches,
Saluant gracieus’mint l’ corache d’vant la mort.

1917