Avant d’ouvrer comm’ galibot,
– Temps héreux qui m’fait cor sourire, –
Cinquant’ gamins in s’rassemblot
Pou fair’ la guerre à tout-pou rire.

Fier comme un paon, no chef avot
Un sabre d’ bos pou nous conduire,
Et v’la not bind’ qu’all’ sin dallot
Cacher eune autr’ bind’ pour l’ poursuire.

Mais, quéqu’fos, des goss’s acharnés
S’invoïott’nt des vrais beurr’s su l’ nez :
Dins s’ n’ ardeur, in tapot d’sus s’ frère !

Les vieux r’vettiant ces faux combats,
A l’orelle i s’ disott’nt tout bas :
– « Cha, comarat’s, ch’est signe ed guerre ! »