À Philéas Lebesgue.

Matin et soir dévant m’ ferniête,
Passe un groupe ed’ soldats all’mands.
Ils march’nt au pas, in r’lévant l’ tiête,
Carrés, solid’s comm’ des géants.

A l’ cadenc’ des marionnettes,
Fiers , ils cant’nt des airs conquérants.
A distanc’ cha donne el trannette,
D’ près ch’est un peu pus rassurant,

Dûss’ qu’i s’in vont, tous ces r’doutapes,
Ces moustaches d’ cats, ces gris diapes,
L’ sourcil froncé in rachin’ d’ail ?

Ils vont au pillache, à l’ rapine,
Ils s’in vont voler des machines
Aux Forgs dé D’nain, au bin chez Cail.

1916.